Ilmend usfugel n useggas amaynut amaziɣ « Yennayer 2970 », tiddukla tadelsant
« NUMIDYA », tsuddes yiwen n wahil d amerkanti seg 09 ar 12 yennayer 2020 di tzeqqa
« Midyatik » di tnebḍit n Wahran. Deg wahil llant-ed aṭas n tsihariyin : tidak n yisɣunen

akked tqendyar n Leqbayel, tasihart n yinaffaren n Ayrad s ɣur tiddukla « Tala n Tusna » n Tizi
Wezzu akked tiddukla « Ayrad » n Bni Snus. Llan diɣ wid id ixedmen tasihart n yifarisen
iqburen ama d zzit uzemmur, tament, tiɣawsiwin n ufexxar, tiflewtin iccudden ɣer usentel

(Amezruy, Adles, Tasekla,…), azenzu n yidlisen s ubuddu. Anecta yakk d aseḥbiber ɣef
tgemmi adelsan.
Yennayer, d aggur amezwaru n useggas ɣer yimaziɣen. D ansay yellan deg waṭas n temnaḍin
n Tmazɣa. D tameɣra taɣelnawt tunṣibt. D acu kan, asfugel d umager n Yennayer, yemgarad
seg temnaḍt ɣer tayeḍ.
D amedya, tamnaḍt n Bni Snus di Tlemsan, deg Umenzu n Yennayer, xedmen yiwen wurar
ideg slusun i walebɛaḍ agelmus igan am yixef n yizem daymi i as-ssawalen Ayrad. Urar-agi,
itekk sebɛa wussan.
Deg tmurt n Leqbayel, d amedya, Amenzu n Yennayer, d tagnit ideg d-ttemlilin wat-uxxam.
Tiwaculin akken llant, ttgent imensi n Yennayer seksu s sebɛa n yisufar d uyaziḍ. Yal wa s
umur-is, ula d wid yunagen, ɣas ulac-iten deg uxxam ass-nni, amur-nsen, yella. Imir-nni,
tettemlili tasa d way turew.
Yennayer, d ass n tumert, d ass yettufaraṣen, yuɣ-d aẓar seg umezruy n yimezwura-nneɣ,
tasuta tettaǧǧa-t-id i tayeḍ.
‘’ A wi ibudden yennayer,
Tafat i medden merra.
Yal afrux, ad yefferfer,
Deg tmurt i tdel leɛnaya.
Tudert, ad tebnu ɣef liser,
Akken nnan yimezwura.’’
Chanez Daḥlal